ფიზიკურ პირთა საყურადღებოდ: ქონების გადასახადის წლიური დეკლარაციის წარდგენის ვადა რამდენიმე დღეში იწურება
ფიზიკური პირის ქონების გადასახადის წლიური დეკლარაციის წარდგენის თარიღი ახლოვდება.
შემოსავლების სამსახურის განმარტებით, ქონების გადასახადის გადახდის ბოლო ვადა ზოგადად კალენდარული წლის 15 ნოემბერია, ხოლო დეკლარაციის შევსება/წარდგენის ბოლო ვადად 1-ლი ნოემბერი, თუმცა, რადგან 2025 წელს ორივე თარიღი შაბათს ემთხვევა, ვადამ მომდევნო სამუშაო დღეზე გადაიწია, შესაბამისად, ფიზიკური პირი 3 ქონების დეკლარაციის წარდგენას ნოემბრის ჩათვლით, ხოლო უშუალოდ გადასახადის გადახდას 17 ნოემბრის ჩათვლით შეძლებს.
ფიზიკური პირი ქონების გადასახადს იმ შემთხვევაში იხდის, თუ მისი და მისი ოჯახის წევრების წლიური შემოსავალი წინა საანგარიშო წელს 40 000 ათას ლარს აღემატება.
კონკრეტულად კი, შემოსავლების სამსახურის ცნობით, ფიზიკური პირი არაუგვიანეს მიმდინარე წლის 3 ნოემბრისა ვალდებულია წარადგინოს ფიზიკური პირის ქონების გადასახადის წლიური დეკლარაცია თუ:
საკუთრებაში აქვს დასაბეგრი მიწა, სარგებლობს/ფლობს სახელმწიფო საკუთრებაში არსებული მიწით, ან მფლობელობაში ან/და სარგებლობაში აქვს გარდაცვლილი პირის სახელზე რეგისტრირებული მიწის ნაკვეთი (გარდა იჯარის, ქირის, უზურფრუქტის ან სხვა ამგვარი ხელშეკრულებით სარგებლობისა); პირის და მისი ოჯახის წევრების შემოსავალი გასული (2024) წლის მიხედვით აღემატება 40 000 ლარს და საკუთრებაში აქვთ დასაბეგრი ქონება (უძრავი ქონება, მათ შორის დაუმთავრებელი მშენებლობა, შენობა-ნაგებობა ან მათი ნაწილი, იახტა (კატარღა), შვეულმფრენი, თვითმფრინავი და მსუბუქი ავტომობილ(ებ)ი (მსუბუქი ავტომობილი − არაუმეტეს 3 500 კგ ნებადართული მაქსიმალური მასის მქონე ავტოსატრანსპორტო საშუალება (გარდა მოტოციკლისა და მოპედისა), რომლის დასასხდომი ადგილების რაოდენობა, გარდა მძღოლის ადგილისა, 8-ს არ აღემატება), მფლობელობაში ან/და სარგებლობაში აქვთ, გარდაცვლილი პირის სახელზე რეგისტრირებული ქონების გადასახადით დაბეგვრის ობიექტი (გარდა იჯარის, ქირის, უზურფრუქტის ან სხვა ამგვარი ხელშეკრულებით სარგებლობისა). ეკონომიკური საქმიანობის განხორციელების შემთხვევაში, ბალანსზე ძირითად საშუალებად აღრიცხული აქტივები, დაუმონტაჟებელი მოწყობილობები და სხვა).
დეკლარაციის წარდგენის ვალდებულება არ წარმოეშობა პირს, თუ: გასულ საგადასახადო წელს წარდგენილი აქვს დეკლარაცია ან დარიცხული აქვს გადასახადი და არ იცვლება მონაცემები. თუ ფიზიკური პირი გასული საგადასახადო წლის მიხედვით იყო ქონების გადასახადის მიხედვით დეკლარანტი და სსკ-ით დადგენილი საგადასახადო შეღავათების გათვალისწინებით მას მიმდინარე საგადასახადო პერიოდის მიხედვით არ წარმოეშობა დეკლარაციის წარდგენის ვალდებულება, არა უგვიანეს საგადასახადო წლის 3 ნოემბრისა განცხადებით მიმართავს საგადასახადო ორგანოს.
ფიზიკური პირი ქონებაზე და მიწაზე ქონების გადასახადს იხდის არაუგვიანეს მიმდინარე წლის 17 ნოემბრისა.