“ჩვენთვის მნიშვნელოვანია ისეთ პროექტებში მონაწილეობის მიღება, რომელიც არ ემსახურება მხოლოდ კერძო ინტერესს და აძლიერებს სახელმწიფოს”
თბილისის აბრეშუმის გზის ფორუმის ფარგლებში, "კედარო ჯგუფმა" ინვესტორებთან სამომავლო თანამშრომლობის გეგმები განიხილა.
ფორუმი თბილისის ოპერისა და ბალეტის თეატრში საქართველოს, სომხეთის და აზერბაიჯანის პრემიერ-მინისტრებმა გახსნეს. ღონისძიებას დელეგატის სტატუსით “კედარო ჯგუფის” დამფუძნებლები ეკატერინე ჭიღლაძე და ნინო ოსეფაშვილი დაესწრნენ. ისინი, ასევე, დაესწრნენ პანელურ დისკუსიას - „საქართველო - ინვესტიციების გადაკვეთის წერტილი" და ორმხრივი შეხვედრები გამართეს უცხოელ და ქართველ პოტენციურ პარტნიორებთან.
პანელური დისკუსია „საქართველო - ინვესტიციების გადაკვეთის წერტილი“ პრემიერ-მინისტრის, ირაკლი კობახიძის და Eagle Hills-ის დამფუძნებელ მოჰამედ ალი ალაბარის გამოსვლით გაიხსნა. დისკუსიისას ალაბარმა აღნიშნა, რომ მისთვის, როგორც ინვესტორისთვის, კომფორტულია ის გარემო, ატმოსფერო, დარგობრივი პოლიტიკა, ისტორია და რეფორმები, რაც საქართველოს გააჩნია. მისივე თქმით, საქართველოს ეკონომიკის 9%-იანი, თუნდაც 7%-იანი ზრდა კარგი მაგალითია და შესაბამისი საინვესტიციო გადაწყვეტილებებიც დადებით ეკონომიკურ პარამეტრებს უკავშირდება.
როგორც ცნობილია, Emaar ჯგუფი საქართველოში, ორ პროექტში - თბილისში, კრწანისის რაიონში და ბათუმის სიახლოვეს, გონიოს ტერიტორიაზე 6,5 მლრდ აშშ დოლარის ინვესტიციას განახორციელებს. საქართველო “იგლ ჰილსის” პროექტების პარტნიორად და კომპანიის 33%-იანი წილის თანამესაკუთრედ განისაზღვრა. შესაბამის საინვესტიციო გადაწყვეტილება საქართველოს ეკონომიკისა და მდგრადი განვითარების სამინისტროსა და კომპანია “იგლ ჰილსს” შორის აბრეშუმის გზის ფორუმის ფარგლებში გაფორმდა.
„კედარო ჯგუფის“ დამფუძნებლის, ეკატერინე ჭიღლაძის თქმით, ეს პუნქტი განსაკუთრებულ მნიშვნელობას სძენს პროექტს, რადგან მასში გამოხატულია საქართველოს სახელმწიფოს ინტერესიც.
„ჩვენთვის დიდი პატივია ამ ფორუმში მონაწილეობა და ისეთი მსხვილი დეველოპერის გამოცდილების გაზიარება, როგორიც არის Emaar ჰოლდინგი. როგორც იცით, Emaar ჰოლდინგი საქართველოში 6,5 მილიარდი აშშ დოლარის მოცულობის ინვესტიციას განახორციელებს, რაც ქვეყნის ეკონომიკისთვის მნიშვნელოვანი ნაბიჯია. ძალიან მალე Emaar ჰოლდინგსა და „კედარო ჯგუფს“ შორის გაცნობითი ხასიათის შეხვედრა შედგება, სადაც დავგეგმავთ მომავალ თანამშრომლობას. ეს ნიშნავს იმას, რომ ჩვენი დამკვეთებისთვის ამ პროექტში ინვესტიციის განხორციელება გახდება შესაძლებელი. ჩვენთვის მნიშვნელოვანია ისეთ პროექტებში მონაწილეობის მიღება, რომელიც არ ემსახურება მხოლოდ კერძო ინტერესს და აძლიერებს სახელმწიფოს“, - აღნიშნა ეკატერინე ჭიღლაძემ.
„იგლ ჰილს საქართველოს“ პროექტის ფარგლებში, თბილისსა და ბათუმის მიმდებარედ განვითარდება თანამედროვე, მრავალფეროვანი ინფრასტრუქტურა. ამავე პროექტის ფარგლებში, ბათუმში იახტების ნავმისადგომიც აშენდება.
რიგით მეხუთე ორდღიანი ფორუმი 22-23 ოქტომბერს, გაიმართა, რომელშიც მაღალი რანგის პოლიტიკური პირები, ბიზნესსექტორის და საერთაშორისო ორგანიზაციების წარმომადგენლები მონაწილეობდნენ.