UAE-ს უმსხვილესი დეველოპერის Emaar Properties-ის დამფუძნებელი თბილისის აბრეშუმის გზის ფორუმში მიიღებს მონაწილეობას
არაბთა გაერთიანებული საამიროების უმსხვილესი დეველოპერის Emaar Properties-ის დამფუძნებელი და მმართველი დირექტორი, მსოფლიოში ცნობილი ანტერპრენერი მოჰამედ ალი ალაბარი თბილისის აბრეშუმის გზის ფორუმში მიიღებს მონაწილეობას.
თბილისის აბრეშუმის გზის ფორუმის ინფორმაციით, მოჰამედ ალი ალაბარი სიტყვით გამოვა ფორუმის პანელურ დისკუსიაზე „საქართველო - ინვესტიციების გადაკვეთის წერტილი“.
მოჰამედ ალი რაშედ ალაბარი ინოვატორი და ანტერპრენერი, აქტიურად არის დაინტერესებული უძრავი ქონების, საცალო ვაჭრობის, სტუმარმასპინძლობის, ელექტრონული კომერციის, ტექნოლოგიების, ლოგისტიკის, კვებისა და სასმელების (F&B) და ვენჩურული კაპიტალის სფეროებით.
1997 წლიდან, მოჰამედ ალი რაშედ ალაბარი ხელმძღვანელობს უძრავი ქონების მმართველ უმსხვილეს კომპანიებს როგორიცაა Emaar Properties და Eagle Hills. უმსხვილესი დეველოპერული კომპანიის, Emaar Properties/Eagle Hills-ის ინვესტიციით, საქართველოში 6 მილიარდი აშშ დოლარის მოცულობისდეველოპერული პროექტები თბილისსა და გონიოში განხორციელდება.
„თბილისის აბრეშუმის გზის ფორუმი“ 22-23 ოქტომბერს მეხუთედ გაიმართება. ფორუმის მიზანია საერთაშორისო პარტნიორებთან თანამშრომლობის გაღრმავება, ახალი ეკონომიკური და საინვესტიციო შესაძლებლობების აღმოჩენა და საქართველოს როლის გაძლიერება, როგორც რეგიონის სტრატეგიული ბიზნეს ცენტრის. ფორუმს სამი ქვეყნის პრემიერ-მინისტრი გახსნის. თბილისის აბრეშუმის გზის ფორუმს 2,000-მდე დელეგატი დაესწრება, მათ შორის მაღალი რანგის პოლიტიკური პირები, ბიზნეს სექტორისა და საერთაშორისო ორგანიზაციების წარმომადგენლები, რეგიონისა და რეგიონს მიღმა ქვეყნების პრემიერ-მინისტრები და ვიცე-პრემიერები.