"კედარო ჯგუფის" წარმომადგენლები კამპანიის "ჩვენი ხმა ევროპას" ფარგლებში, ორბელიანების სასახლეში გამართულ პრეზიდენტის მიღებას დაესწრნენ.
სასახლეში გამართულ მიღებას საქართველოს უძრავი ქონების ეროვნული ასოციაციის წევრი საბროკერო კომპანიებისა და სხვადასხვა სფეროს წარმომადგენლები ესწრებოდნენ.
თითოეული სტუმარი პეტიციაზე ხელის მოწერით ადასტურებდა სურვილს, რომ საქართველო გახდეს ევროპის ნაწილი.
პეტიციის შინაარსს უცვლელად გთავაზობთ:
"ჩვენ, საქართველოს მოქალაქეები,
მოგმართავთ თქვენ - ევროპის ლიდერებს - დეკემბრის ისტორიულ გადაწყვეტილებამდე. გვსურს მოგაწვდინოთ ჩვენი, ხალხის ერთობლივი ხმა და დაგანახოთ ჩვენი ერთობლივი სულისკვეთება.
მოგმართავთ, მიანიჭოთ ჩვენს ქვეყანას კანდიდატის სტატუსი, თანახმად საქართველოსა და მისი ხალხის მრავალწლიანი მიზანმიმართული სწრაფვისა და ურყევი ნებისა.
საქართველოს ხალხის გამოხატული ნება ვერ შეარყია ვერცერთმა ურთულესმა გამოწვევამ - ვერც ომმა და ვერც ოკუპაციამ. ჩვენი წარსულით და საერთო ღირებულებებით დიდი ხანია ერთნი ვართ. მაშასადამე, ჩვენი მომავალი თქვენთანაა, ევროპაშია და ამას ალტერნატივა არ გააჩნია!
საქართველოს კონსტიტუციაში ჩაწერილი პირობის თანახმად, ძალისხმევას არ დავიშურებთ და არაფერს დავაკლებთ ჩვენს მიზანს: სხვადასხვა პოლიტიკური მსოფლმხედველობის მიუხედავად, ერთობის ძალით ხელს ვაწერთ ამ პეტიციას და ვითხოვთ კანდიდატის სტატუსს",- აღნიშნულია პეტიციაში.
